Vísindasjóðir Wyeth
Wyeth starfrækir 3 vísindasjóði, á sviði meltingarsjúkdóma, geðsjúkdómafræða og gigtsjúkdómafræða. Hér að neðan má nálgast nánari upplýsingar um sjóðina, umsóknareyðublað og úthlutunarreglur.
Úthlutun styrkja hefur þegar farið fram í árin 2008 og 2009. Umsóknarfrestir fyrir árið 2010 verða auglýstir síðar.
Vísindasjóður á sviði meltingarsjúkdóma
Árleg úthlutun úr Vísindasjóði Wyeth á sviði meltingarsjúkdóma fór fram þann 13. febrúar 2008. Að þessu sinni hlaut ein umsókn styrk úr sjóðnum.
Sjöfn Kristjánsdóttir sérfræðingur í meltingarsjúkdómum, hlaut 800.000 króna framhaldsstyrk til verkefnisins “Faraldsfræðileg rannsókn á kirtilsepaæxlum í ristli og tengsl við ristilkrabbamein á Íslandi 1960 - 2004.”. Markmið verkefnisins er að kanna möguleg tengsl kirtilsepaæxla í ristli og ristilkrabbameins. Áætlað er að skoða um 3-5000 vefjasvör og flokka þau eftir staðsetningu, stærð og vefjagerð. Niðurstöður verða síðan samkeyrðar við aðra gagnagrunna.
Vísindasjóður Wyeth á sviði meltingarsjúkdóma óskar styrkþega til hamingju.
Í stjórn sjóðsins sitja þeir Kjartan Örvar og Ásgeir Böðvarsson, tilnefndir af Félagi sérfræðinga í meltingarsjúkdómum og Kristín Traustadóttir fulltrúi Wyeth sem er formaður úthlutunarnefndar.
Vísindasjóður á sviði geðsjúkdómafræða
Úthlutun úr Vísindasjóði Wyeth til rannsókna á sviði geðsjúkdómafræða fór fram á Vísindaþingi Geðlæknafélags Íslands sem haldið var í Stykkishólmi 26.- 27. september 2008. Þrjú verkefni hlutu styrk úr sjóðinum að þessu sinni:
Jón Friðrik Sigurðson dósent og forstöðusálfræðingur hlaut 400.000 króna styrk fyrir verkefnið “ Einkenni geðrænna og líkamlegra vandkvæða hjá konum sem leita til mæðraverndar á LSH vegna áhættu á meðgöngu og hjá þunguðum konum sem leita til geðsviðs LSH”. Verkefnið hefur að markmiði að kanna tengsl þunglyndis, kvíða og streitu við líkamleg vandkvæði á meðgöngu eins og offitu, sykursýki 2 og meðgönguháþrýsting/meðgöngueitrunar hjá þessu tveimur hópum kvenna. Meðumsækjendur Jóns í þessari rannsókn eru Halldóra Ólafsdóttir yfirlæknir, Linda Bára Lýðsdóttir sálfræðingur, Marga Thome, dósent í hjúkrunarfræði og Reynir Tómas, prófessor í Læknadeild HÍ og yfirlæknir kvennasviðs LSH.
Ákveðið var að styrkja einnig 2 framúrskarandi vísindaverkefni sem kynnt voru á Vísindaráðstefnu Geðlæknafélags Íslands. Verkefnin voru tilnefnd af geðlæknunum Engilbert Sigurðssyni og Páli Matthíassyni sem sátu í undirbúningsnefnd ráðstefnunnar.
Erik Eriksson læknir hlaut 300.000kr. styrk til verkefnisins "Hefur meðferð með þunglyndis- og kvíðalyfjum áhrif á árangur HAM meðferðar hjá hópi í heilsugæslu".
Einnig hlaut Magnús Haraldsson geðlæknir 300.000kr. styrk til rannsóknaverkefnisins "Val158met breytileiki catechol-O-methyltransferasa og antisaccade augnhreyfingar í geðklofa".
Í úthlutunarnefnd Vísindasjóðs Wyeth sátu Halldór Kolbeinsson og Jón G. Stefánsson tilnefndir af Félagi íslenskra geðlækna og Sólveig B. Einarsdóttir fyrir hönd Wyeth. Úthlutunarnefnd óskar styrkþegum til hamingju með styrkinn.
Umsóknareyðublað
Vísindasjóður á sviði gigtsjúkdómafræða
Árleg úthlutun úr Vísindasjóði Wyeth á sviði gigtsjúkdóma fór fram þann 19. júní 2008. Að þessu sinni hlutu 4 umsóknir styrki úr sjóðnum.
Árni Jón Geirsson gigtlæknir hlaut 200.000 króna styrk til verkefnisins "Hryggikt á Íslandi".
Björn Guðbjörnsson gigtlæknir hlaut 200.000 króna framhaldsstyrk til verkefnisins “The Reykjavik Psoriatic Arthritis Study- Erfðir sóragigtar - ”.
Björn Rúnar Lúðvíksson yfirlæknir hlaut 300.000 króna framhaldsstyrk til verkefnisins "Áhrif Enbrel og Infliximab á sérhæfingu CD4+CD25- T-fruma í T-stýrifrumur". Starfsmaður í verkefninu er Laufey Geirsdóttir líffræðingur.
Kristján Steinsson yfirlæknir hlaut 300.000 króna framhaldsstyrk til verkefnisins: "Minnkuð tjáning PD-1 viðtakans hjá SLE sjúklingum og ættingjum þeirra. Tengsl við PD-1.3A arfgerðina". Starfsmaður í verkefninu er Helga Kristjánsdóttir líffræðingur.
Í úthlutunarnefnd sátu Magnús Guðmundsson og Kári Sigurbergsson tilnefndir af Félagi íslenskra gigtlækna og Kristín H.Traustadóttir fyrir hönd Wyeth.
Vísindasjóður Wyeth óskar styrkþegum til hamingju með styrkinn.
Umsóknareyðublað
Árleg úthlutun styrkja árið 2009.
Vísindasjóður á sviði gigtsjúkdómafræða
Þann 7. maí s.l. var úthlutað úr Vísindasjóði Wyeth og var þetta í 5. skipti sem úthlutað var til rannsókna á sviði gigtarsjúkdóma.
Að þessu sinni var ákveðið að hafa styrkina færri en stærri og jafnvel að styrkja eingöngu eitt verkefni. Úthlutunarnefndin ákvað að skilgreina hvaða þættir skyldu vega þungt við val styrkumsókna og voru eftirfarandi þættir valdir: Verkefni þarf að fela í sér nýnæmi, nýting styrkupphæðar þarf að vera vel skilgreind og upphæðin þarf að skipta máli fyrir verkefnið.
Alls bárust 4 umsóknir og var ákveðið að veita 1 milljón króna til verkefnis Arnórs Víkingssonar gigtarlæknis og Jónu Freysdóttur ónæmisfræðings
"Áhrif náttúruefna á liðagigt í rottum".
Í umsögn um verkefnið segir: Hér er á ferðinni nýjung - nýsköpun, verkefnið er algjörlega íslenskt og byggir á íslenskum efnivið.Tímabilið er vel skilgreint og afmarkað við 1 ár. Sótt er um 1 milljón króna og styrkupphæðin er um 25% af heildarupphæð verkefnisins, sem er hæsta hlutfall af heildarupphæð innsendra verkefna.
Í úthlutunarnefnd sátu prófessor Karl G. Kristinsson yfirlæknir Sýklafræðideildar LSH og Magnús Guðmundsson gigtarlæknir tilnefndir af Félagi íslenskra gigtarlækna og Kristín H.Traustadóttir fyrir hönd Wyeth.
Vísindasjóður Wyeth óskar styrkþegum til hamingu með styrkinn.