TVT - Lausnin við þvagleka kvenna
Inngangur
Þvagleki er algengur kvilli meðal kvenna. Talið er að önnur hver kona verði fyrir því einhvern tímann á ævinni að leka þvagi. Samkvæmt rannsókn* sem var gerð árið 2002 hafa 40% íslenskra kvenna á aldrinum 35-76 ára misst þvag einhvern tímann á sl. 4 vikum og 28% þeirra töldu einkennin hafa neikvæð áhrif á lífsgæði sín. Að jafnaði þá er þetta vandamál 14% kvenna á öllum aldri. Tvær tengudnir þvagleka eru algengastar, áreynsluleki og bráðaleki. Fyrri tengundin lýsir sér sem leka við skyndilega áreynslu eins og hósta, hnerra, hopp o.s.frv. Stafar lekinn af því að skyndilegur þrýstingur verður á þvagblöðruna vegna innri líffæra sem blöðruhálsinn ræður ekki við að sporna á móti. Þannig lekur þvagið á meðan á álaginu stendur en er ekki til staðar í hvíld. Hin tegundin, bráðaleki, stafar af samdrætti í þvagblöðru sem veldur þvi að þvagið pressast út án þess að konan geti ráðið við það.
Til er blandað form beggja þessara tegunda, svokallaður blandleki. Ástæða þvagleka er ekki að fullu kunnug. Talið er að slakur grindarborn, annað hvort vegna slits eða innbyggðs veikleika á bandvef valdi áreynsluleka. Orsakir bráðaleka má annað hvort rekja til ertingar á blöðruveggnum sjálfum eins og á sér stað við blöðrubólgu eða annarra óeðlilegra taugaboða sem konan ræður ekki við að hamla gegn. Meðhöndlun þessara tveggja tegunda er frábrugðin.
Áreynsluleka er reynt að meðhöndla annað hvort með því að styrkja grindarbotninn með æfingum (grindarbotnsæfingar) eða með skurðaðgerðum. Meðhöndlun bráðaleka miðar að þvíað draga úr samdrætti þvagblöðrunnar. Reynt er að beita til þess gerðum lyfju, rafmeðferð eða æfingum.
Ný aðgerð við áreynsluleka
TVT (togfrítt skeiðarband) er skurðaðgerð við áreynsluleka sem miðar að því að styrkja blöðruhálsinn án þess að tog verði á leggöng eða upphækkun þar á. Þess vegna er hætt á þvagtregðu eftir aðgerð lítil og sjaldan þörf að setja upp þvaglegg. aðgerðin er ýmist gerð í staðdeyfingu, mænudeyfingu eða svæfingu og því er hægt að framkvæma hana nánast öllum án tillits til líkamlegs atgervis. Konur geta síðan ýmist farið heim samdægurs eða daginn eftir. Netið er ekki fest heldur krækir það sig í vefinn sem það fer í gegnum og fylgir honum við allar hreyfingar. Aðgerðin læknar hreinan áreynsluleka í allt að 86% tilfella auk þess að bæta verulega líðan hjá 11% til viðbótar.
Aðgerðalýsing
Aðgerðin er gerð gegnum leggöng. Neti er komið fyrir undir þvagrás með þar til gerðum nálum og leitt bak við lífbein og dregið upp í gegnum ca. 1 1/2 cm skurð sem gerður hefur verið í húð ofan lífbeins. Aðeins tekur 25-30mín. að framkvæma aðgerðina og konan getur í flestum tilfellum farið heim sama dag eða daginn eftir. Netið styður strax undir þvagrásina og vöðvana eftir að því hefur verið komið fyrir og þar með er lekinn læknaður. Henni fylgir tiltölulega lítill sársauki og konan þarf þvi stuttan tíma tila ð jafna sig á eftir og getur farið til fyrri starfa innan viku til tíu daga.
Þúsundir slíkra aðgerða hafa verið gerðar um allan heim til að lækna áreynsluþvagleka og fara vinsældir hennar sívaxandi vegna einfaldleikans og þess góða árangurs sem að hún felur í sér.